曱甴的士

「廿幾萬公里都未換過引擎！」的士司機A提起他那輛「錢十」豐田的士。

「我打死都唔信豐田車有事！班鬼佬都唔知點開部車架啫，我呢部車，八年來整都未整過！仲要唔同更司機喎！當初以為石油氣車會整死人，而家D車房佬真係慘！」的士司機B說。

「嘩，個架澳洲『大舊衰』，係唔駛錢整啊，唔駛錢整我唔駛開工啊？送都唔要啊！」的士司機C一提起當年的Ford Falcon旅行車的士，就氣上心頭。

的士，在香港早就給豐田壟斷。去年開始新皇冠的士只有四座版本，司機們怨聲載道，但仍然無可奈何，五座位的「錢十」唯有拖得一年得一年，但一旦「錢十」告老歸田，他們仍然會心甘命抵的繼續用豐田。無他，既是沒有選擇(只有豐田的士)，也是有選擇 (只有豐田才如此「襟捱」)。

豐田的回收事件，完全沒有影響他們對這老牌子的信心，相反太多競爭對手的「經典事跡」，令他們到現在提起都「猶有餘悸」。眾多廠家想打香港的士市場的主意，想必在做過眾多市場研究之後都一直連樓梯響也聽不到。這篇文章再說就像在為豐田宣傳，但我只想說，有哪間廠可以生產出不斷蹂躪了廿幾萬公里，整完又撞，撞完又整仍然會行會走的曱甴的士，我樂見其成。當然，假如保時捷願意運他們在德國的Panamera的士來讓大家試坐，那就更好。