CVT波箱與人的「麥兜對話」

好窮。年尾好窮。

我的財政狀況不在話下，我說近幾個月出的車，都好「窮」。之前提過的Mirage、日產的Note和Sunny，全部都好「窮」。不是指價錢夠「窮人恩物」，而是都用了三氣缸貧燃引擎，還未計有些在公路行走時，其中一個引擎會「睡一睡」罷工那些。連寶馬1 series都研究如何學他們「窮」。明明唔窮學人扮窮，叫「寒酸」。

汽車雜誌都說：很有希望啊！時勢不好啊！油價飛升，大家要環保d啊！我心想，那麼環保，坐巴士囉！行路囉！

我在想，為何駕車要那麼「窮」？窮也不只，還要加CVT無段變速，跣啊跣啊跣啊…我想，假如車可以和車主對話，大概會是這樣：

人：大佬啊，我kick 緊down架喎，你無嘢啊嘛？

CVT：慢慢黎，後生仔，有d嘢唔急得架，一急又嘥油架啦…跣跣跣。

人：阿伯，我想爬頭喎。你叫我唔好急？你個三氣缸引擎手足嗌到拆天啦喎。

CVT：哎啊，有人，啊唔係，有engine嗌咩？我聽唔到…都話要慢慢黎囉…跣跣跣。

人：我頂你唔順啦，我都係想要番傳統自動波的車。

CVT：後生仔，好食油架，做人咁急無益架，慢D個人又順D，我地呢d見慣風浪，出左幾十年，以前都仲係只能湊1.5公升呢d細路，而家夠膽服侍3公升以上個d大人架啦！呢架1.2就更加無問題啦！跣跣跣…

人：你見慣風浪就唔會一直淨係內銷啦！你一個海都過唔到啊，仲風浪！

CVT：後生仔你真係無禮貌，你而家唔係用緊我咩？出左個海架啦，黎到香港了，你們香港人不是很喜歡「日本本土版」咩？跣跣跣…拿拿拿，而家咪比到油你囉！

人：我x你！我而家落緊鈄啊！我想人手降檔但你唔比啊。

CVT：所以咪叫你忍讓吓囉…

忽然覺得好麥兜，連駕車都咁「麥兜」，鬼叫你窮仲係都要駕車啊！頂唔順都要
頂！